مجھ سے جو اُس نے گفتگو کی ہے

[زنیرہ عقیل]

مجھ سے جو اُس نے گفتگو کی ہے
دل میں رہنے کی جستجو کی ہے
وہ جھکی سی نگہ کہ جس نے پھر
مجھ کو پانے کی آرزو کی ہے
میرے الفاظ بھی لرزنے لگے
بات جب اس کے روبرو کی ہے
خاک ارماں ہوئے کہ اس کی تو
چاہ بس جسم کے سبو کی ہے
وہ نہیں جانتا ہے کیا ہے عشق
پھر بھی اس نے یہ آرزو کی ہے
چاک داماں ہوں پھول کی مانند
دل کو ہے فکر تو رفو کی ہے
منجمد خوف سے ہے خوں میرا
پیاس اُس کی میرے لہو کی ہے
شاخ پر ان بجھے سے پھولوں کو
ڈھار شبنم سے اب وضو کی ہے۔
کہ مہکنا تو گُل کی فطرت ہے
توڑنا اِس کو خُو عُدو کی ہے

زنیرہ گل