پیشِ نظر رسالہ حضرت بنوری رحمہ اللہ نے ۱۳۷۴ھ میں سہ روزہ ’’صدق‘‘ (لکھنؤ) کے لیے تحریر فرمایا تھا، جو کہ مولانا عبد الماجد دریا آبادی کی زیر ادارت نکلا کرتا تھا۔ باعثِ تحریر کچھ یوں تھا کہ ہندوستان کے شہر جے پور کے ایک علمی گھرانے سے تعلق رکھنے والی شخصیت مولانا عبد الرحیم مجددی نے نزولِ مسیح کا انکار کیا اور ان کا موقف سہ روزہ ’’صدق‘‘ میں شائع ہوا، جس کے جواب میں حضرت بنوری رحمہ اللہ نے چھ قسطوں میں اس باطل نظریہ کی بھرپور تردید کری اور قرآن، حدیث، اجماعِ امت اور اقوالِ فقہاء و محدثین کی روشنی میں عقیدۂ نزولِ مسیح کی وضاحت پیش کی، چنانچہ آپ کا یہ مکمل مضمون بھی ’’صدق‘‘ میں شائع ہوا تھا، حضرت بنوری رحمہ اللہ نے اس چھوٹے سے مقالہ میں بیش بہا علمی نکات سمو دیے ہیں جو کہ آپ کا خاصہ ہے، اور بلا شبہ آپ امام العصر حضرت انور شاہ کشمیری رحمہ اللہ کے ان چند قابل فخر تلامذہ میں سے ہیں جن پر زمانہ صدیوں ناز کرے گا۔
