تخلیقِ کائنات کا مقصد

زنیرہ عقیل

منتظم اعلی۔ أیدہ اللہ
Staff member
منتظم اعلی
قرآن مجید میں بہت سی جگہ عقیدۂ آخرت کے اثبات کے لئے یہ دلیل پیش کی گئی ہے کہ اگر اس کائنات کی تخلیق کامنشا صرف یہی ہوتا کہ اس دنیا کا نقشہ وجود میں آجائے اور اس کا کوئی نتیجہ نہ ہو تو یہ محض ایک فعلِ عبث اور کھیل تماشا ہوتا اور اللہ تعالیٰ کی ذاتِ قدسی صفات کھیل تماشے سے بلند وبالا اور عبث ولا یعنی سے پاک اور منزہ ہے۔

’’ پس کیا تمہارا خیال ہے کہ ہم نے تمہیں عبث پیدا کیا ہے اور یہ کہ تم ہماری طرف لوٹائے نہیں جائو گے۔ (سورۂ المؤمنون)

یہ کارخانہ عالم بے نتیجہ و بے مقصد نہیں بلکہ ذریعہ و وسیلہ ہے ایک بڑے مقصدکا، یہ عبوری و عارضی اور امتحانی وابتلائی زندگی خود مقصد نہیں بلکہ یہ تمہید ہے آخرت کی ،جہاں کی زندگی ابدالآباد کی زندگی ہوگی، سورئہ فاتحہ سے سورئہ الناس تک بے شمار مقامات پر محیر العقول معجزانہ اسلوب اور عجیب مؤثر انداز میں یہ حقیقت بار بار ذہن نشین کرائی گئی ہے، سورئہ فاتحہ میں جسے ایک مسلمان کم ازکم ۳۲ مرتبہ روزانہ پڑھتا یا سنتا ہے حق تعالیٰ کی ربوبیت اور رحمتِ عامہ کے فوراً بعد یوم الدین کی مالکیت اور بادشاہی کااعلان کیا گیا ہے تاکہ ہر لحظہ یہ عقیدہ پیش نظر رہے کہ دنیا مقصد نہیں اصل منزلِ مقصود آخرت اور صرف آخرت ہے۔

(بصائر و عبر: ص۴۰۴)
 
Top