مسجد نبوی کا دلکش سائباں اچھا لگا

[قاسمی]

سید اسد اللہ حسینی
۔۔۔۔۔۔۔۔۔۔۔۔۔۔۔۔۔۔۔۔۔۔۔۔
ایک طرحی نعت شریف جس کو ورنگل کے
مشاعرے میں پیش کر کے سامعین کو متاثر کیا ۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔
مسجد نبوی کا دلکش سائباں اچھا لگا
گنبد خضراء کا حسن جاوداں اچھا لگا

ہر قسم کے قافلے محو سفر میں دوستو!
زائرین مصطفی کا کارواں اچھا لگا

دعوتِ حق پر گئے تھے مصطفےٰ عرش بریں
داعی معراج سا وہ میزباں اچھا لگا

یوں تو دنیا میں کئی اک باغ ہیں رشک جناں
پر حرم کی سر زمیں کا گلستاں اچھا لگا

ہوگیا مغلوب کشتی میں رکا نہ دیکھئے
احمدؐ مرسل سا ہم کو پہلواں اچھا لگا

پاسبانئ حرم بھی اک فریضہ ہے مگر
سید کلؐ انبیاء سا پاسباں اچھا لگا

کیسے کیسے شاہ گزرے ہیں زمانے میں اسد
وہ مدینے کا شہنشاہِ زماں اچھا لگا

سید نور اللہ نور جمشید پوری
ٹلکو۔ جمشید پور، جھاڑکھنڈ
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
آپ پھولوں میں گلاب اہل جہاں کے واسطے
دین حق کے ماہتاب اہل جہاں کے واسطے

رحمتِ عالم لقب ہے سید کونین کا
ہیں دریاؤں کے گلاب اہل جہاں کے واسطے

یہ نماز پنجگانہ اور یہ حج و زکوٰۃ
لائے یہ قرآں نصاب اہل جہاں کے واسطے

ایسا پیغمبر کوئی آیا کہاں ہے فرش پر
حق نے بھیجا لا جواب اہل جہاں کے واسطے

نور بخشش کی سند سرکار سے مل جائے گی
آپ ہیں رحمت کا باب اہل جہاں کے واسطے[align=center]​

[/align]