اختلافات فقہا میں سے حق ایک ہے یا متعدد
یہ ایک مشہور علمی مسئلہ ہے کہ جن مسائل میں ائمہ مجتہدین مختلف ہیں ایک چیز کو ایک امام حلال قرار دیتا ہے اوردوسرا حرام اور امت کا اس پر اتفاق ہے کہ دونوں امام اہل حق ہیں اور ہر ایک کے مقلد کو اپنے اپنے امام کے قول پر عمل کرنا جا ئز بلکہ واجب ہے تو بحث یہ آتی ہےکہ کیا عند اللہ اس چیز کا حلال ہونا بھی حق ہے اور حرام ہونا بھی ،یا حق ایک ہی ہے ؟ اسی مسئلہ میں علمائے اصول کی مفصل بحثیں ہیں اور ایک مدت مدیدہ ہوئی شیخ التفسیر حضرت مولانا شبیر احمد عثمانی رحمۃ اللہ علیہ نے اس موضوع پر ایک رسالہ ‘‘ ہدیہ سنیہ ‘‘ کے نام سے تحریر فر مایا تھا ۔
اس مسئلہ پر ایک بہترین تحریر امام محمد بن حسن رحمۃ اللہ علیہ کی رسالہ‘‘بلوغ الامانی‘‘کی عبارت کا اردو ترجمہ استفادہ کیلئے ہدیہ ناظرین ہے جو اس اہم مسئلہ کا نہایت مکمل اور بہترین حل ہے۔
‘‘ ابن ابی العوام نے طحاوی سے اور انہوں نے شعیب بن الکسانی سے اور انہوں نے اپنے والد سے روایت کیا کہ انہوں نے نقل فر مایا کہ امام محمد بن حسن نے ہمیں املا لکھا یا جس میں فر مایا کہ جب لوگ کسی مسئلہ میں مختلف ہوں ایک فقیہ ایک شئے کو حرام قرار دے اور دوسرا حلال اور دونوں کو اجتہاد کا حق حاصل ہو تو صواب ( حق) اللہ تعالیٰ کے نزدیک ان میں دونوں میں سے ایک ہی ہے ۔ کیونکہ اللہ تعالیٰ کے نزدیک ایک ہی شئی حرام وحلال دونوں نہیں ہو سکتی ، بلکہ حق اللہ تعالیٰ کے نزدیک ایک ہی ہو گی اور مجتہد اس کا مکلف ہے کہ وہ اپنی رائے اور اجتہاد کو اس میں خرچ کرے تا کہ وہ اس کی حقیقت کو پہنچ جائے جو اللہ تعالیٰ کے نزدیک حق ہے ۔پس اگر اپنی رائے اور اجتہاد میں وہ اس حق کو پہنچ جائے جو اللہ کے نزدیک حق ہے تو اس پر اس کو عمل کرنے کی بھی اجازت ہے کیونکہ وہ جس کام کا مکلف تھا اس وہ ادا کر دیا ۔ اگر چہ جو اللہ کے نزدیک متعین حق ہے اس پر نہیں پہنچا تا ہم جس چیز کا مکلف تھا وہ تو ادا کردیا اور مستحق ثواب ہو گیا ۔ لیکن یہ درست نہیں کہ کوئی شخص یہ کہے کہ ایک امام نے ایک عورت کو حلال کر دیا اور دوسرے نے حرام اور اللہ کے نزدیک دونوں درست اور حق ہیں ۔بلکہ اللہ کے نزدیک حق ایک ہی ہے البتہ قوم فقہاء اپنے فرائض سے سبکدوش ہو گئی کیونکہ وہ اپنے مقدور بھر اجتہاد کر چکی اسلئے ان کو اس پر عمل کرنا جائز ہوگا اگر چہ ان دونوں میں سے ایک ضرور حق مطلوب میں خطا کی ہے مگر چو نکہ وہ اپنی کو شش کو خرچ کر چکا ہے تو اپنے فرائض سے سبکدوش ہو گیا اگر چہ حقیقت کے اعتبار سے اس نے خطا کی کیونکہ حق تعالیٰ کے نزدیک تمام اشیاء میں حق ایک ہی ہے ۔یہ سب امام اعظم ابو حنیفہ اور ابو یوسف کے قول ہیں اور یہی ہمارا مذہب ہے ۔ وھذا کلہ قول ابی حنیفہ وابی یوسف وقولنا ( بلوغ الامانی)
